Monday, October 6, 2008

Ang Website at Internet

Ang internet ang isa sa mga bagong kinagigiliwan ngayon ng mga tao hindi lang ng mga estudyante kundi pati na rin ng mga bata at matanda. Maraming mga website ang pwedeng pagpilian na talaga namang tinatangkilik ng mga tao.

Nakapagbibigay sa atin ang internet ng maraming impormasyon. Nagbibigay din ito sa atin ng kasiyahan at libangan. Ang pinakakinagigiliwan ngayon ng mga estudyante ay ang Friendster. Sa Friendster, nakasulat at nakalagay dito ang ating mga kaibigan. Binibigyan tayo nito ng kasiyahan dahil sa pamamagitan nito naaalala at napapadama natin ang ating pagmamahal sa ating mga kaibigan kahit sila ay nasa malayo. Isa pang website ay ang Youtube. Sa Youtube, maaari tayong makanood at magdownload ng mga videos. Kahit anong video ay pwede nating mapanood dito.

Ang iba pang website ay ang Google at Yahoo. Sa dalawang ito naman, makakahanap tayo ng impormasyon at mga datos tungkol sa anumang bagay na ating hahanapin. Makakatulong ito sa atin nang malaki kapag tayo ay nananaliksik tungkol sa ating takadang aralin.

Ilan lang yan sa mga website na pwede mong puntahan sa internet. Marami pang iba na hindi nabanggit. Iba na nga ang panahon ngayon. Umunlad na nga ang ating industriya at teknolohiya. Pero wag sana nating isapawalang bahala at kalimutan ang ating mga sinauna at makalumang kultura. Wag nating kalimutan na ang mga lumang kultura na itinaguyod ng ating mga ninuno ay nakatatak na sa ating kasaysayan. Magtulungan tayong lahat tungo sa isang masaya at maunlad na hinaharap.

Friday, October 3, 2008

Mabuti at Masamang Epekto ng Kompyuter

Umuunlad na nga ang ating panahon ngayon. Marami na ang mga makabagong teknolohiya tulad ng cellphone, MP3, Mp4, ipod at higit sa lahat kompyuter. Para sa karamihan, ang kompyuter ay isang napakahalagang imbensyon at malaki ang naitutulong nito sa atin. Pero hindi alam ng lahat, bukod sa mga mabuting epekto nito, mayroon din itong masamang epekto.

Unahin na natin ang mabuting epekto. Ang kompyuter ay isang teknolohiyang nagbibigay sa atin ng maraming impormasyon. Halimbawa na lamang, kapag tayo ay mayroong mga projects o kaya ay takdang aralin sa paaralan, mas napapadali tayong maghanap ng mga kasagutan. Hindi na tayo mahihirapan maghanap sa mga libro, ang kompyuter na mismo ang magbibigay sa atin ng sagot. Pangalawa, tumutulong din ang kompyuter para magkaroon tayo ng komunikasyon sa mga mahal natin sa buhay sa ibang bansa. Nakakatulong din ng malaki ang kompyuter sa mga negosyo gamit ang internet. Ang kompyuter ang pangunahing dahilan ng mga I.T. students sa pagpili nila sa kanilang kurso.

Sunod naman ay ang mga masamang epekto ng kompyuter. Una na diyan ang problemang naidudulot nito sa mga kabataan. Ang iba ay napapabayaan na ang kanilang pag-aaral dahil sa kompyuter. Naadik ang mga kabataan sa paglalaro ng mga games tulad ng DOTA. Pangalawa, hindi lang oras ang nasasayang, pati na rin ang pera. Winawaldas ng mga estudyante ang kanilang pera sa paglalaro kaysa sa pagkain. Pangatlo at huling masamang dulot ng kompyuter ay ang sakit na pwedeng maidulot nito. Dahil sa tagal na pagkatutok sa kompyuter, hindi maiwasang sumakit ang kanilang ulo o kaya'y pagkahilo.

Lubusan na ngang umuunlad ang teknolohiya ngayon. Pero lagi nating tandaan na hindi puro mabuti ang maidudulot nito. Maari din itong makasama sa atin. Kaya payong kapatid lang, hinay hinay lang sa paggamit at wag nating abusuhin ang mga teknolohiyang ito.

Thursday, October 2, 2008

Mga Gabay sa Pagpili ng Kurso

Marami sa atin ang nahihirapan sa pipiliin nating kurso sa kolehiyo. Maraming bagay ang ating isinasaalang-alang o binibigyang katuturan at kahulugan kaya tayo hindi makapamili nang maayos. Mayroon din namang ilang mga gabay na lubusang makakatulong sa atin sa pagpili ng kurso.

Una na sa mga dahilan ang pera. Ang pera kadalasan ang pinakaimportanteng bagay na ating isinasaalang-alang sa pagpili ng kurso. Hindi natin makuha ang ating gustong kurso dahil hindi ito kayang bayaran ng ating mga magulang dahil na rin sa kagipitan ng buhay ngayon. Mas uunahin na muna ang mga pangunahing pangangailangan tulad ng pagkain, damit, bayad sa bahay at kuryente bago ang pag-aaral. Ito na rin marahil ang dahilan kung bakit maraming kabataan ngayon ang hindi nakakapag-aral.

Pangalawang dahilan ay ang ating mga magulang. Hindi nagkakapareho ang ating gustong kurso sa gusto ng ating mga magulang. Nalilito tuloy tayo kung susundin ba natin ang ating gusto o susundin natin ang ating mga magulang.

Hindi pa naman huli ang lahat. Mayroon pa namang mga paraan upang makapamili tayo nang maayos. Heto ang ilang mga gabay sa pagpili ng kurso. Una, kung di natin talaga kaya ang mahal na kurso, meron pa namang magagandang kurso na mura lang ang kailangang bayaran tulad ng Information Technology. Mura na, in-demand pa. Pangalawa, subukang pumasok sa scholarship na meron ang paaralan. Kung susuwertihin, baka makalibre ka pa kung makapasa ka sa pagsusulit. Pangatlo, mag-usap kayo ng iyong magulang kung ano ba talaga ang makakabuti sa iyong kurso. At huli, pumili ng kursong kaya mong intindihin ng mabuti o hindi ka mahihirapan.

Ilan lang yan sa mga gabay sa pagpili ng mabuting kurso. Ang kolehiyo na ang huling yugto ng ating pag-aaral. Pagkatapos nito ay magtatrabaho na tayo. Lagi lang nating tandaan na kailangan nating mag-aral nang mabuti para sa ating magandang kinabukasan. Sabi nga ni Rizal, "Ang kabataan ang pag-asa ng aitng bayan".